RRB ALP Exam Date: సికింద్రాబాద్‌ రైల్వేలో 2,528 అసిస్టెంట్‌ లోకో పైలట్‌ పోస్టులు.. పరీక్ష తేదీలు ఇవే

రైల్వేలో అసిస్టెంట్‌ లోకో పైలట్‌ నియామక రాత పరీక్ష సిటీ ఇంటిమేషన్‌ స్లిప్పులను రైల్వే శాఖ విడుదల చేసింది. పరీక్షకు దరఖాస్తు చేసుకున్న అభ్యర్ధులు ఈ కింది డైరెక్ట్ లింక్ ద్వారా సిటీ ఇంటిమేషన్‌ స్లిప్పును డౌన్ లోడ్ చేసుకోవచ్చు.. హైదరాబాద్‌, నవంబర్‌ 18: రైల్వే ఉద్యోగాలకు సీరియస్‌గా ప్రిపేరవుతున్న అభ్యర్ధులకు రైల్వే శాఖ మరో అప్‌డేట్‌ విడుదల చేసింది. అసిస్టెంట్‌ లోకో పైలట్‌ నియామక రాత పరీక్ష సిటీ ఇంటిమేషన్‌ స్లిప్పులను రైల్వే శాఖ ఇటీవల విడుదల చేసింది. పరీక్షకు దరఖాస్తు చేసుకున్న అభ్యర్థులు అధికారిక వెబ్‌సైట్‌లో తమ రిజిస్ట్రేషన్‌ నంబర్‌, యూజర్‌ పాస్‌వర్డ్ లేదా పుట్టిన తేదీ వివరాలు నమోదు చేసి తమ పరీక్ష కేంద్రం వివరాలను ( సిటీ ఇంటిమేషన్‌ స్లిప్పు) డౌన్‌లోడ్‌ చేసుకోవచ్చు. ఈ స్లిప్పులో పరీక్ష కేంద్రం, సిటీ, పరీక్ష తేదీ, సమయం, మార్గదర్శకాలు వంటి తదితర వివరాలు ఉంటాయి. ఇక త్వరలో నే అడ్మిట్‌ కార్డులు కూడా విడుదల కానున్నాయి. కాగా దేశ వ్యాప్తంగా ఉన్న వివిధ రైల్వే జోన్లలో మొత్తం 18,799 అసిస్టెంట్‌ లోకో పైలట్‌ కొలువులకు ఈ ఏడాది జనవరిలో ఆర్‌ఆర్‌బీ ప్రకటన జారీ చేసిన సంగతి తెలిసిందే. మొత్తం పోస్టుల్లో సికింద్రాబాద్‌ రైల్వే జోన్‌లో 2,528 వరకు ఖాళీలు ఉన్నాయి. ఈ పోస్టులకు సంబంధించిన నియామక రాత పరీక్ష నవంబర్‌ 25, 26, 27, 28, 29 తేదీల్లో దేశ వ్యాప్తంగా పలు పరీక్ష కేంద్రాల్లో నిర్వహించనున్నారు. సీబీటీ 1, సెకండ్‌ సీబీటీ 2, కంప్యూటర్‌ బేస్డ్‌ ఆప్టిట్యూడ్‌ టెస్ట్‌, డాక్యుమెంట్ వెరిఫికేషన్, మెడికల్ ఎగ్జామినేషన్ తదితరాల ఆధారంగా అభ్యర్థుల తుది ఎంపిక జరుగుతుంది.